Ciraaq waxba ma yeelin qaxootigii la mustaafuriyay
10. nov. 2009 10.54 SoomaaliMuddo ka badan laba bilood dabadeed, markii 22 ciraaqi qasab dayuurad loogu mustaafuriyay Baqdaad 2dii sebtambar, ma jiraan warar sheegaya, in ciraaqiyiintii la celiyay wax la yeelay ama la jidh dilay. Ururka Kirkeasyl ayaa sidaas u sheegay wargayska B.T.
Shan ciraqqiyiinta la celiyay ka mid ah ayaa muddo yar lagu hayay madaarka Baqdaad, laakiin markii lacag laga bixiyay waa la sii daayay, tan iyo markaasna ma jirto cid danbe oo la qabtay.
- Ciraaqiyiintii la celiyay waxay ku kala dhuunteen gobollo kala duwan, badidooduna woqooyiga ciraaq ayay tegeen. Inta aan kala socdo, ma jiraan cid kale oo dawladdu xidhay ilaa markaas.
Mana ogi sidoo kale, cid la jidh dilay ama la waxyeelleeyay, laakiin lama aanaan wada xidhiidhin dadkii la celiyay oo dhan, sidaas ayuu afhayeenka ururka Kirkeasyl, Pelle Dragsted ku yidhi wargayska B.T.
Sidoo kale safaaradda deenishka ee Baqdaad iyo labadii qareen ee qaxootiga la celiyay u doodayay Kaare Traberg Schmidt iyo Helge Nørrung, midkoodna kama warhayo, in qaar ka mid ah ciraaqiyiintii la mustaafuriyay la xidhay ama la jidh dilay.
Waxa tarjumay: Ahmed Diria Liban