LA oo ka fajacay dadka badan aan shaqayn
29. jan. 2013 13.27 Soomaali- Muddo badan ayaannu ogayn, inay arrintani u socdo dhinac qaldan. Laakiin inay halkaas xaaladdu gaadhsiisan tahay waa wax laga naxo.
Guddoomiyaha xisbiga Liberal Alliances Anders Samuelsen ayaa ka naxay, in saadaashu hadda muujinayso, in sannadka 2013 saddex degmo oo keli ah oo ka mid ah 89 degmo ee Danmark ay aqlabiyadda dadwaynaha deggeni shaqeeyaan.
Wuxu hadda rabaa, in baarlamanku ka doodo, waxa dad badan oo deenish ahi aanay u shaqayn.
Sannadkii 2009 tiro ka badan kala badh, ama 59 degmo ayaa aqlabiyadda dadkoodu shaqayn jireen.
- Arrinta waa dhibaato wayn oo la soo deristay mustaqbalka Danmark, waxana ay ku sii jeedna jidka saboolnimada. Haddii arrimuhu sidan u sii socdaan waxba u ma qaban karno dadka jilicsan ee u baahan caawimada. Markabkeennu wuu degayaa, ayuu yidhi Anders Samuelsen.
Dalka ayay wax yeelaysaa
Habeenimadii axadda ayaa warka axadda ee 21 Søndag uu sheegay in saddex degmo oo keli ah ay aqlabiyadda dadkoodu ku jiraan suuqa shaqada.
Tanina waa dhibaato wayn oo walaaceeda leh, ayuu qabaa Anders Samuelsen.
- Dawladdu xoog gacanta ugu ma qabato dhibaatooyinka. Waxa loo baahan yahay isbedello gun iyo baar ah oo lagu sameeyo suuqa shaqada deenishka - haddii aan sidaas la samayn, nidaamku wuu burburayaa. Hadda waxa aynnu u baahan nahay jawaab cad oo la xidhiidha waxa dawladdu ku talojirto, ayuu yidhi Anders Samuelsen.